Miðgarður er ein  kommunalur dagstovnur í Miðvági, sum læt upp 8. august 2011. Stovnurin er opin allar gerandisdagar frá kl. 7.15 til kl. 17.00. Vit samlast á Kálvalíðstovu og Kirkjastovu um morgunin. Kl. 8.30, fara vit inn á okkara egnu stovur. Tá kl. er 16.30 samlast vit aftur inni á Kálvalíðstovu og Kirkjastovu og eru har til vit stongja.

9 stovur eru á stovninum; 3 vøggustovur, smábarnastova, 3 barnagarðsstovur,  stova til tey 6 ára gomlu, og serstova.

 

Vøggustovur:

Kálvalíðstova tlf. 794521

Jansastova tlf. 794522

Bakkastova tlf. 794523

Kumlastova tlf.794524

 

Barnagarðsstovur:

Kirkjastova tlf. 794531

Rygsstova tlf.: 794532

Húsastova tlf. 794533

Eiriksstova tlf.: 794534

 

Tey 6 ára gomlu:

Heiðastova tlf. 794535

 

 

Avlevering og avheintan av børnum

Vit ynskja, at foreldrini koma inn á stovuna við barninum, so vit vita, at tit eru komin. Tað sama er galdandi, tá tit koma eftir barninum. Sigið altíð frá, tá tit fara heim og lætið portrið eftir tykkum, tá tit koma og fara.

 

Um onnur enn foreldur heinta barnið, skal hetta boðast stovuni frá. Systkin sum avheinta vøggustovubørn, skulu ikki vera undir 13 ár.

 

Fráboðan og uppmøting:

Foreldur verða biðin um at ringja ella senda boð áðrenn kl. 9.30, um barn tykkara um kemur seinni enn kl.9.30. Um barnið er sjúkt, verða tit biðin um at kunna stovuna um hetta, um barnið hevur frí, er ikki neygut at siga frá

 

Endamál stovnsins:

Vit arbeiða eftir dagstovnalógini § 2 www.logir.fo

 

Felags virðisgrundarlag fyri dagstovnarnar í Vága kommunu er:

• Spæligleði
• Samstarv
• Viðurkenning
•  

Virkisætlan:

Vit hava gjørt ein virkisætlan fyri Miðgarð, sum er settur saman av trimum kjarnuvirðum.

·         At skapa eitt opið og rúmligt umhvørvi á stovninum.

·         At børnini møta lurtandi vaksnum.

·         Vit vilja glað, lærandi og spælandi børn.

 

Tit kunnu lesa meir um okkara virðisgrundarlag ogl virkisætlan sum liggur á www.midgardur.fo undir "um okkum".

Virðisgrundrarlagi og virkisætlanin er grundarlagið undir okkara arbeiði.

 

Vit eru eitt lurtandi stað, har menning og upplivingar fáa frítt spæl. Har nærvera er ein týðandi partur av okkara arbeiði, soleiðis at børn trívast og mennast í tryggum umhvørvi.

Øll børn mennast  hvør í sínum lag. Vit ynskja at skapa eitt umhvørvið sum stuðlar undir eini menning og lærutilgongd, sum tekur støði í barnsins áhuga, undran og forvitni. Vit vilja skapa umstøður, soleiðis at hvørt barnið, fær ment øll síni viðføddu evni.

Náttúran og nærumhvørvið er ein natúrligur og týðandi partur í okkara gerandisdegi saman við børnunum - her hugsa vit um hvussu týdningarmikið tað er, at børnini fáa rørt seg, og hvussu nógv rørslurnar hava at siga fyri menningina hjá barninum.

Eisini hava vit ymisk verkstøð sum gevur okkum møguleikar at fara í dýbdina saman við børnunum, og harvið fáa stimbrað og ment teirra hugflog og skapandi evni.

 

Foreldrasamstarv

Vit vilja fegin hava eitt gott foreldrasamstarv - at børn og vaksin kenna seg væl at koma inn í húsið. Vit eru álítandi, opin og erlig - og vit lurta, eisini tá vit eru ósamd.

Øll menniskju eru ymisk. Hetta merkir at vit mugu hava virðing fyri øðrvísi hugsanum, enn okkara egnu - at vit virða og viðurkenna ymisleikarnar hjá hvørjum øðrum.

Vit síggja møguleikar fram um forðingar, og hava ein jaligan hugburð til okkara arbeiði. Vit leggja dent á, at starvsfólkabólkurin er í menning, og harvið altíð er tilreiðar at møta nýggjum avbjóðingum. Foreldrini eiga til eina og hvørja tíð at kenna tryggleika við stovnin og at hava álit á starvsfólkunum - og sjálvsagt eitt gott samstarv millum stovn og heim er høgt raðfest.

Er nakað tit vilja tosa við okkum um, eru tit altíð vælkomin til tað.

 

Heimasíða

Miðgarður hevur sína egnu heimasíðu, www.midgardur.fo 

Við heimasíðini ynskja vit at lýsa námsfrøðina í Miðgarði.

 

Facebook vangamynd

Miðgarður hevur facebook vangamynd, hetta hevur verið ynski frá foreldraráðnum, fyri at fáa eina enn betri kunning út til foreldur. 

Stovurnar hava bólkar har tær lýsa tað námsfrøðiliga arbeiði, við at vísa ymiskar støðumyndir, hvat rørir seg í barnabólkinum, og annars hvussu vit arbeiða námsfrøðiliga. 

Um foreldur ynskja at fáa kunning ígjørnum facebook, verða tit biðin at adda Miðgarð, so verða tit koyrd inn á bólkin hjá stovuni barnið gongur á.

 

Tagnarskylda

Starvsfólkini á stovninum skriva undir tagnarskyldu við starvsetan, og heldur hon ikki uppat við uppsøgn.

 

Klæðir

Navn skal á øll klæðir! Umráðandi er, at tit halda skil á, at tað altíð eru skiftiklæðir á plássinum hjá barninum. Í Miðgarði vilja vit fegin vera úti hvønn dag, óansæð veður. Tí er umráðandi at børnini hava klæðir við sum passa til veðrið. Kavadrakt, regnklæðir og gummistilvar skulu tey altíð hava, tá tað eru tey mest brúktu klædnapløggini her í húsinum. Eisini mugu vøggustovubørnini hava klæðir at sova í.

 

Matarskipan

Miðgarður koyrir íløtini við eini matarskipan til ársenda 2019, har møguleiki er at børnini fáa heilsugóðan mat, meðan tey eru á stovni, ímóti eini gjaldi á 300,- / mdr. Sí námsfrøði.

 

Vit hava gjørt ein kostpolitikk og leggja vit dent á, at børnini fáa ein sunnan kost frá okkum. Sí okkara kostætlan www.midgardur.fo undir "um okkum" Vit meta, tað er umráðandi at geva børnunum sunnar og góðar matvanar, meðan tey eru smá.

 

Frukt

Børnini fáa frukt frá stovninum. 

 

Fastir frídagar

Umframt leygar/sunnudag og halgidagar eru hesir at rokna sum serstakir frídagar :

jólaaftan, nýggjársaftan, páskaaftan, hvítsunnuaftan, flaggdagin, ólavsøkudag.

Grundlógardag og ólavsøkuaftan aftaná kl. 12.

Stovnurin fer í summarferiu 4 vikur í  juli/august, tó er møguleiki fyri ansing eftir avtalu.

Stovnarnir í Vágum skiftast um at hava opið í summarferiuni.

Stovnurin er stongdur ímillum jól og nýggjár.

Miðgarður hevur fastan ráðleggingardag fyri starvfólkunum, sum er dagin aftaná

Kristi Himmalferðardag, tá er stovnurin stongdur.

 

Kostnaður

1/1 pláss  í barnagarði kostar : 1.750,-   1/2 pláss í barnagarði kostar :   970,-

1/1 pláss í vøggustovu kostar: 2.270,-    1/2 pláss í vøggustovu kostar : 1.250,-

Systkinafrádráttur er givin til familjur við meiri enn einum barni í ansing soleiðis, at bert verður rindað fult gjald fyri tað yngsta barnið, meðan 25 % frádráttur verður latin fyri systkin.

Goldið verður fyri 11 mánaðir, og goldið verður forút. Juli mánaður er gjaldfríur, og barnið

skal vera í feriu minst 4 vikur.

Full ansingartíð hjá barni er frá kl 7.15 til kl. 17.00, tó í mesta lagi 9 tímar.

Hálv ansingartíð er antin fyrrapart ella seinnapart, ella aðru hvørja viku.

 

Frípláss

Tað ber til hjá øllum at søkja um frípláss. Tit fáa eitt oyðiblað á skrivstovuni ella www.vaga.fo.

Avgerð um frípláss verður altíð tikin út frá hvør inntøkan var seinasta ár, ella um tað er stór

broyting í inntøkugrundarlagnum tá søkt verður.

 

Um barnið gevst

Uppsagnartíðin er 1 mánaður, tann 1. í hvørjum mánað.

 

 

Sjúka

Um barnið er sjúkt og ikki kann fylgja einum gerandisdegi við t.d. ikki at kunna fara út, kann tað ikki vera á stovninum. Sigið frá um morgunin, um barnið er sjúkt. Soleiðis at vit kunnu siga frá, um smittandi sjúkur eru. Barnið er vælkomið aftur á stovnin, tá barnið hevur verið feburfrítt 24 tímar.

 

 

 

Føðingardagar

Tosa við starvsfólkini á stovuni, um hvussu tit ynskja, at føðingardagurin hjá barninum skal haldast. Vit gera vart við at ikki er loyvt at leggja myndir av børnunum út á alnótuna. Vit leggja sjálvi myndir út á face-book bólkin hjá stovnuni. 

 

Leikur

Um børnini hava leikur við á stovnin, tekur stovnurin ikki ábyrgd av hesum.

 

Blæur.

Børn ið nýta blæur, skulu hava tær við sjálvi.

 

Foreldrafundir.

Foreldraviðtalur eru tá tørvur er á hesum. Vit leggja upp til eitt dagligt samskifti, bæði tá barnið kemur á stovn og tá barnið verður heinta. Umráðandi er at um okkurt er, at vit hava tað álit á hvønn annan, at vit tosa um tað beinavegin, er tað ov stórt at tosa um, í gongini, so biða vit um eina viðtalu, har vit seta tíð  av til hetta, og tað sama ynskja vit at tit gera.

Foreldrafundur stovuvís er á heysti. Eisini skipar foreldraráðið fyri einum felags foreldrafundir árliga, við ásettari dagskrá. Um tit annars hava okkurt at tosa um, antin viðvíkjandi tykkara barni ella viðvíkjandi okkum starvsfólkum, so eru tit altíð vælkomin at siga tað við okkum. Er trupulleikin ov stórur ella ov persónligur at tosa við viðkomandi starvsfólk um, set teg so í samband við leiðaran.

 

Foreldraráð

Endamál foreldraráðsins er at fremja áhugamál foreldranna við stovnin og at arbeiða positivt fyri at styrkja um samstarvið millum heimið, stovnin og kommununa.

Telduposturin hjá foreldraráðnum er: foreldur.midvag@vaga.fo. Hvør umboðar foreldraráðið sæst við hyggja inn á www.midgardur.fo undir foreldraráð.